Fresta því að leggja fram kæru

Engar varúðarmerkingar voru við jarðrask verktaka Kópavogsbæjar í Heiðmörk þegar Vinnueftirlit ríkisins gerði úttekt á svæðinu í gær.

Eftirlitsmenn gerðu margvíslegar athugasemdir enda er skurðurinn allt að sex metra djúpur og háir ruðningar á bökkunum. Samkvæmt reglum ber verktaka að merkja viðlía vinnusvæði og koma upp borðum með fram skurðinum. Jafnframt var gengið frá því að verktakinn mætti fara inn á svæðið til að bæta þar úr á þessu sviði.

Stjórn Skógræktarfélags Reykjavíkur varð í gærkvöldi við þeirri bón Vilhjálms Þ. Vilhjálmssonar borgarstjóra að fresta því að kæra Kópavogsbæ og Klæðningu fyrir náttúruspjöllin. Kæran verður þó lögð fram eftir tæpa viku, ef viðunandi niðurstaða hefur ekki náðst fyrir þann tíma, en vilji borgarstjóra er að fara samningaleiðina.

Náttúruverndarsamtök Íslands kærðu hins vegar Kópavogsbæ til lögreglu í gær fyrir brot á skipulags- og náttúruverndarlögum og vilja að bærinn verði látinn sæta ábyrgð að lögum.