Grunaðir um að hafa reynt að stela þorski úr eldiskví

Tveir trillukarlar frá Akureyri eru grunaðir um að hafa reynt að stela þorski úr eldiskvíum Brims skammt frá Krossanesi um síðustu helgi.

Síðastliðinn sunnudag varð Sævar Þór Árnason umsjónarmaður kvíanna hjá Brimi var við að bátur hafði lagst að einni kvínni. Hann hringdi strax í lögreglu vegna gruns um að þeir væru að stela fiski en þegar þeir komu að landi voru þeir fisklausir. Það sanni ekki sakleysi þeirra því mögulega hafi þeir losað sig við hann í sjóinn á leiðinni til hafnar. Brim muni leggja fram kæru og myndband því til sönnunar að sjómennirnirhafi athafnað sig á bannsvæði.

Mörg hundruð tonn af fiski eru í kvíunum þannig að Sævar segir erfitt að sjá hvort einhverjum tonnum hafi verið stolið. Sögusagnir séu þó um að menn hafi reynt að stela eldisfiskinum áður. Trillukarlar eigi ekki að þvælast á eldissvæðinu sem merkt sé með belgjum, það sé hreinlega lögbrot að fara nær kvíunum en um tvö hundruð metra og Brim sjái sér ekki annað fært en að láta reyna á málið hjá lögreglu og dómstólum.