Ösku dreift yfir höfuð og enni kirkjugesta

Á öskudegi gera börn sér yfirleitt glaðan dag og er þetta einn af eftirminnilegustu dögum barnanna þar sem búningar, söngvar og gleði eru í fyrirrúmi, eins og sjá mátti á aragrúa uppábúna barna um allt land í dag.

En það eru ekki allir sem vita að öskudagurinn á sér mjög langa og trúarlega sögu og í kaþólskri trú eru öskudagsmessur haldnar víða um hinn kaþólska heim enda markar öskudagur upphaf Lönguföstu.

Í öskudagsmessu í Kristkirkju í dag, var ösku dreift yfir höfuð og enni kirkjugesta. Sr. Jürgen Jamin, sóknarprestur í Kristkirkju, sagði í samtali við Fréttastofu Stöðvar 2, að askan sem notuð sé við messuna, sé aska af pálmagreinum sem notaðar eru við messu árinu áður á Pálmasunnudag. Askan sé tákn fyrir iðrun, sorg og yfirbót.

Um sjö þúsund manns eru í kaþólska söfnuðunum kirkjunni hér á landi og er þeim gert skylt að fasta í dag, öskudag. Aðpurður hvernig fólki gengi að halda í við sig á föstunni, sagði Sr. Jürgen að hver og einn yrði að eiga það við sig.