Innflutt matvara oftast ódýrari á Íslandi en í Danmörku og Noregi

Verð á innfluttri matvöru, annarri en landbúnaðarvörum, var oftast lægra á Íslandi en í Noregi og Danmörku samkvæmt nýrri verðkönnun félags íslenskra stórkaupmanna.

Af tíu vörum sem athugaðar voru í lágvöruverðsverslunum á borð við Bónus var verðið sjö sinnum lægst á Íslandi. Í stórmarkaðsverslunum eins og Hagkaupum var verðið þrisvar sinnum lægst hér á landi.

Andrés Magnússon, framkvæmdastjóri félags íslenskra stórkaupmanna, sagði í þættinum Íslandi í dag í gærkvöldi að þetta staðfesti að íslenskir kaupmenn stæðu sig vel. Landbúnaðarstefna stjórnvalda héldi hins vegar uppi himinháu verði á kjötvörum og öðrum landbúnaðarvörum sem væru stór hluti af hefðbundinni matarkörfu.

Stjórnvaldsaðgerðir valda því líka að tvær eða þrjár vörutegundir voru dýrastar á Íslandi. Það má rekja til þess að þær eru tollaðar á Íslandi en ekki í Noregi og Danmörku. Tekið skal fram að í öllum tilvikum var um innfluttar vörur að ræða sem framleiddar eru annars staðar í heiminum en fluttar til Noðrurlanda.