Engin sýking í seiðum á Laxeyri

Ranglega var skýrt frá því í frétt á Vísir.is í gær, sem höfð var eftir Skessuhorni, Vesturlandsvefnum, að sýktum seiðum hefði verið eytt hjá seiðaeldisstöðinni á Laxeyri í Borgarfirði. Um slíkt var ekki að ræða eins og fram kemur í meðfylgjandi athugasemd Jóns Guðjónssonar stöðvarstjóra. Vísir biðst velvirðingar á þessum mistökum.

Yfirlýsing Jóns er eftirfarandi:

"Af gefnu tilefni vill seiðaeldisstöðin á Laxeyri í Borgarfirði koma því á framfæri að engin seiði eru sýkt í stöðinni og engum seiðum hefur verið eytt vegna nýrnaveiki. Frétt sem birtist á fréttavefnum www.visir.is, Fréttablaðinu í dag, www.skessuhorn.is og í prentútgáfu Skessuhorns í dag er með öllu tilhæfulaus um að sýkt seiði eigi í hlut. Einungis var um það að ræða að hrognum var eytt vegna hugsanlegs smits, en slíkt kemur fyrir í þeim stöðvum sem meðhöndla villtan fisk.

F.h. Laxeyrar,

Jón Guðjónsson, stöðvarstjóri."