Sýknaður af ákæru um kynferðisbrot vegna aldurs

Héraðsdómur Vesturlands sýknaði í gær ungan mann af kynferðisbroti gegn stúlkubarni á þeim grundvelli að hann væri ósakhæfur fyrir aldurs sakir.

Ákæran á hendur manninum var í tveimur liðum, annars vegar fyrir kynferðisbrot og hins vegar líkamsárás.

Í fyrri ákæruliðnum var manninum gefið að sök að hafa brotið gegn stúlku á sjötta ári stúlku á sveitabæ sumarið 2004 með því að segja henni að loka augunum og opna munninn en um leið stakk hann getnaðarlim sínum upp í munninn á henni. Í kjölfarið bannaði hann stúlkunni að segja frá þessu því annars myndi hann fara í fangelsi. Stúlkan greindi hins vegar frá þessu í fyrra og viðurkenndi maðurinn fyrir dómi að hafa stungið lim sínum upp í hana.

Dómurinn komst hins vegar að þeirri niðurstöðu út frá framburði ákærða og stúlkunnar að brotið hefði átt sér stað sumarið 2003 en ekki sumarið 2004 og því hefði ungi maðurinn verið 14 ára en ekki 15 og því teldist hann ósakhæfur sökum aldurs. Var hann því sýknaður.

Hins vegar var hann dæmdur til að greiða stúlkunni 300 þúsund krónur í miskabætur vegna verknaðarins sem dómurinn segir mjög alvarlegan og eigi eftir að hafa rík áhrif á líf stúlkunnar. Með þessu hafi ákærði einnig brugðist trausti stúlkunnar og neytt yfirburða sinna gagnvart henni.

Seinni ákæruliðurinn laut að líkamsárás mannsins á hendur öðrum manni á dansleik í Borgarnesi árið 2005. Dómnum þótti sannað að ungi maðurinn hefði kýlt hinn á dansleiknum og sakfelldi hann því fyrir líkamsárás. Í ljósi þess að brotaþolinn átti upptökin að átökunum og með hliðsjón af ungum aldri ákærða var refsing hins vegar látin niður falla.