Reynir á íslensku bankana, segir S & P

Nú reynir á íslensku bankana þegar hægir á íslensku efnahagslífi og erfiðarar verður að nálgast lánsfé á erlendum mörkuðum, segir greiningarfyrirtækið Standard & Poors í nýrri skýrslu um íslensku bankana.

Í tilkynningu frá Standard & Poors vegna skýrslunnar segir að langtímahorfur fyrir bankanna séu góðar í ljósi blómstrandi og sveigjanlegs efnahagslífs á Íslandi. Hins vegar standi bankarnir frammi fyrir fyrsta alvöru prófinu á því viðskiptalíkani sem þeir hafi þróað undanfarin þrjú ár nú þegar hægi á hagvexti og dragi úr möguleikum á lánum.

Bent er á að viðskiptabankarnir þrír, Glitnir, Kaupþing og Landsbankinn, ráði yfir um 90 prósent markaðarins á Íslandi en umsvif þeirra hafi vaxið mikið annars staðar á Norðurlöndum og í Bretlandi. Þeirr eigi nú meiri eignir í útlöndum en á heimamarkaði.

Minnkandi eftirspurn og fjárfesting á Íslandi ásamt því sem það dregur úr vexti bankanna á alþjóðavettvangi muni þó leiða til lakara starfsumhverfis fyrir bankana. Ef ekki verði harðari lending í efnahagslífinu en áætlað sé eigi bankarnir þrír þó að geta tekist á við þessar aðstæður og þar skipti miklu máli hve víða þeir séu komnir með starfsemi og hve sterk staða þeirra sé innanlands.

Mesta hættan sem bankarnir standi frammi fyrir stafi af öðrum stórum útrásarfyrirtækjum. Ef þau verði fyrir skakkaföllum geti það haft áhrif á afkomu bankanna vegna þess hversu náin tengsl séu á milli bankanna og þessara stóru fyrirtækja.