Falsaði tölvupóst til setts ríkissaksóknara

Einn af aðstoðarlögmönnum Baugsmanna falsaði tölvupóst frá Sigurði Tómasi Magnússyni, settum saksóknara, til Tryggva Jónssonar, fyrrverandi aðstoðarforstjóra Baugs. Pósturinn var í dag sýndur dómurum í Baugsmálinu af lögmanni Tryggva til að sýna fram á óáreiðanleika tölvupósta.

Hluti tölvupósta sem að lagðir hafa verið fram í málinu fundust aðeins í tölvu Jóns Geralds Sullenberger en ekki tölvum Baugsmanna. Jakob Möller, verjandi Tryggva, vildi þannig sýna fram á hversu auðvelt er að falsa tölvupósta og benti á að auðveldlega væri hægt að finna á netinu upplýsingar um hvernig þetta er gert.

Sigurður Tómas sagði óumdeilt að mögulegt væri að falsa alla tölvupósta. Hins vegar hefðu sérfræðingar farið yfir póstana í málinu og ætlar hann einnig að láta þá fara yfir þennan póst til að fá álit þeirra á honum.