Harma það að almennir borgarar taki lögin í sínar hendur

SAFT, vakningarverkefni Heimilis og skóla - landssamtök foreldra, um örugga netnotkun barna og unglinga á Íslandi, harmar það að hinn almenni borgari skuli taka lögin í sínar eigin hendur og geri út tálbeitur fyrir barnaníðinga á netinu.

Í yfirlýsingu frá Heimili og skóla er vísað til viðtals við tvo 15 ára drengi úr Hafnarfirði á Bylgjunni í morgun en þar sögðu þeir algengt að unglingar gerðu út tálbeitur á Netinu í þeim tilgangi að veiða barnaníðinga í gildru, taka af þeim myndir og jafnvel hafa af þeim fjármuni. Fram hefði komið viðmælendur hefðu ekki vitneskju um að lögreglan hefði varað við því að fólk tæki lögin í sínar hendur með þessum hætti.

Beinir SAFT þeim tilmælum til foreldra og skólayfirvalda að taka þetta mál til umfjöllunar, þar sem það við á, og tryggja þannig að börn og unglingar taki ekki þátt í aðgerðum af þessu tagi sem geti verið bæði ólöglegar og hættulegar.