Segir Vestfirði og Norðurland vestra hafa verið vanrækt

Vestfirðir og Norðurland vestra hafa verið vanrækt, þar fækkar íbúum stöðugt, og það er til skammar að láta slíkt gerast árum saman. Þetta sagði þingmaður Samfylkingarinnar í Norðvesturkjördæmi í harðri ádeilu á ríkisstjórnina í fyrirspurnartíma á Alþingi.

Í óundirbúnum fyrirspurnum á Alþingi í gær vakti Anna Kristín Gunnarsdóttir athygli á því að hagvöxtur hefði verið neikvæður um langt árabil á Vestfjörðum og Norðurlandi vestra. Hún innti ráðherra eftir gerð vaxtasamnings við Norðurland vestra og sagði ríkisvaldið ætla að setja smáaura í málið.