Kosningaloforðið Suðurstrandarvegur vék fyrir Suðurlandsvegi

Kosningaloforðið Suðurstrandarvegur varð að víkja fyrir brýnna verkefni, tvöföldun Suðurlandsvegar yfir Hellisheiði. Þetta segja oddvitar stjórnarflokkanna í Suðurkjördæmi, þau Guðni Ágústsson og Drífa Hjartardóttir. Suðurstrandarsvegur, milli Grindavíkur og Þorlákshafnar, er skólabókardæmi um margsvikin kosningaloforð, sagði útgerðarmaður á Suðurlandi, sem Stöð 2 ræddi við í gær og bæjarstjóri Ölfuss sagði ekki hægt að búa við slík svik. Þingmennirnir sem gegna lykilhlutverki í kjördæminu afsaka þetta með öðru brýnna verkefni.

Samgönguáætlun gerir ráð fyrir að 540 milljónir króna verði settar í Suðurstrandarveg en að mati Drífu Hjartardóttur vantar eins og 300 milljónir í viðbót til að unnt sé að ljúka verkinu.