Vill ekki að klámiðnaður nái fótfestu hér á landi

Geir H. Haarde forsætisráðherra lýsti þeirri skoðun sinni á Alþingi í dag að hann vildi ekki að klámiðnaðurinn næði fótfestu hér á landi. Með því tók hann undir orð Ingibjargar Sólrúnar Gísladóttur, formanns Samfylkingarinnar, sem gerði fund fólks úr klámiðnaði hér á landi í byrjun marsmánaðar að umtalsefni í fyrirspurnartíma á Alþingi.

Geir sagði jafnframt að hann hefði óbeit og andstyggð á klámiðnaðinum og því sem honum fylgdi eins og vændi og mansal, ekki síst því sem sneri að börnum.

Geir sagðist hins vegar ekki kunnugt um hvort þeir sem hingað ætluðu að koma myndu standa fyrri slíkri starfsemi og að ekki væri hægt að hefta för þeirra nema ljóst væri að þeir ætluðu að aðhafast eitthvað ólöglegt.  Hann sagði að fram hefði komið að lögregla væri með málið til rannsóknar og hann vænti þess að ef um ólöglegt athæfi verði að ræða myndi lögreglan láta til sín taka.

Ingibjörg Sólrún benti hins vegar á að málið snerist ekki um persónulegar skoðanir heldur það að menn í klámiðnaði hygðust koma hingað. Vísaði hún í heimasíðu þeirra sem standa að fundinum þar sem fram kæmi að aðilarnir myndu ræða viðskiptatækifæri í greininni. Spurði hún hvort ekki væri hægt að koma þeim skilaboðum til þessara aðila að þeir væru ekki velkomnir hingað til lands.

Geir sagðist ekki hafa kynnt sér heimasíðuna en ítrekaði það sem hann hafði sagt áður, að lögregla myndi taka á málinu ef ástæða þætti til.