Virða þarf ferða- og fundafrelsi

Frjálshyggjufélagið hefur sent frá sér ályktun vegna einhliða fréttaflutnings af væntanlegum fundi fólks úr klámiðnaðnum hérlendis. Þar kemur fram að virða þurfi frelsi fólks til að ferðast og eiga fundi.

Ályktun:

Vegna umræðna um væntanlegan fund leikara og framleiðenda á erótískum myndum sem halda á hérlendis er vert að taka fram að frelsi fólks til að ferðast og eiga fundi þarf að virða.

Mikilvægt er að átta sig á því að mansal og erótík eru ekki sami hluturinn. Nánast allir þeir sem starfa í og við framleiðslu á erótík gera það af fúsum og frjálsum vilja sem sést best á því að í Bandaríkjunum eru starfandi stéttarfélög og hagsmunasamtök fólks í þessari atvinnugrein. Það er hins vegar leikur þeirra sem una öðrum ekki frelsis til athafna og skoðana að fullyrða að þeir sem komi að erótík séu undantekningalaust tengdir mansali og öðru grófu ofbeldi.

Að beita annað fólk ofbeldi er rangt. Þess vegna er rangt að beita ofbeldi gagnvart saklausu fólki sem hingað kemur til að eiga fundi. Afskipti stjórnvalda af ferðum og fundum fólks er háttur einræðisríkja og væri svartur blettur á góðri ímynd landsins.

Umbera þarf ólíkar skoðanir og viðhorf til lífsins. Enginn leggur það til að þeim sem eru á móti erótísku efni sé bannað að eiga fundi eða ferðast. Að sama skapi ættu þeir hinir sömu að virða frelsi og skoðanir hinna sem eru slíku efni fylgjandi.