Kostnaður óljós við tafir á byggingu nýrrar sundlaugar í Mosfellsbæ

Ekki er vitað hvaða tafir og tæknilegir örðugleikar við byggingu nýrrar sundlaugar í Mosfellsbæ munu kosta, segir forseti bæjarstjórnar. Hann segir þó að ekkert muni koma í veg fyrir að sundlaugin verði opnuð á sumardaginn fyrsta, en til stóð að taka hana í notkun í október síðastliðnum. Eins og fréttastofa Stöðvar 2 hefur greint frá lentu íbúar í nágrenni nýju íþróttamiðstöðvarinnar í Mosfellsbæ í vandræðum með heita vatnið á heimilum sínum þegar vatni var hleypt á útisundlaug fyrir skemmstu. Karl Tómasson, forseti bæjarstjórnar segir að tæknilegar útskýringar byggingafulltrúa séu fullgildar, veðurfar hafi líka spilaði inn í tafir. Karl bendir reyndar á að upphaflega hafi átt að opna útisundlaugina á næsta ári en bjartsýni verktaka hafi gert það að verkum að ákveðið hafi verið að flýta verklokum. Aðspurður hvort ekki sé verið að efna kosningaloforð Sjálfstæðismanna í bænum nú rétt fyrir alþingiskosningar þegar bæjarstjórinn sé í framboði, neitar Karl því alfarið.

Þegar Karl var inntur eftir kostnaði vegna tafa við framkvæmdirnar segir hann ekki búið að taka það saman. Bæjarbúar geti þó ornað sér við að ekki verði frekari tafir, sundlaugin verði vígð sumardaginn fyrsta næstkomandi.