Útlent nautakjöt selt sem íslenskt

Á sjötta hundrað tonn af nautakjöti voru flutt til Íslands á síðasta ári. Þó virðist heyra til undantekninga að íslenskir neytendur séu upplýstir um upprunaland vörunnar. Hluti kjötsins kemur frá löndum þar sem gin- og klaufaveikifaraldur hefur komið upp á síðustu árum, eins og Hollandi og Frakklandi.

Framboð á íslensku nautakjöti hefur minnkað síðustu misseri og nú er svo komið að flutt voru inn um 600 tonn af nautakjöti á síðasta ári til að anna eftirspurn. Réttur neytenda á að vita hvort kjötið sem þeir kaupa er innlent eða erlent er algerlega ótvíræður að mati Landssambands kúabænda.

Baldur Helgi Benjamínsson, framkvæmdastjóri sambandsins, segir misbrest á því að upprunaland vörunnar sé tilgreint og segist ekki vita til þess að nokkurt eftirlit sé haft með slíkum merkingum. Auk þess að vera sjálfsagður réttur neytenda telji kúabændur það hagmunamál að íslenskar vörur séu merktar sem slíkar.

Á síðasta ári var mest flutt inn af kjöti frá Þýskalandi og Nýja Sjálandi, en einnig frá Danmörku og Ítalíu.

Hluti kjötsins kemur frá löndum þar sem gin- og klaufaveikifaraldur hefur komið upp á síðustu árum, eins og Hollandi og Frakklandi þar sem síðast faraldur geysaði árið 2001.

,,Þetta er ekki gott fyrir sjúkdómavarnir og okkur þykir þetta óæskilegt", segir Baldur sem segir reglurnar þær að nokkur tími þurfi að líða þar til landið er frítt af sjúkdómi og þangað til leyfi fæst til að flytja þaðan kjöt.

Erlenda nautakjötið ratar hvort tveggja í verslanir og inn á veitingastaði. Sjálfur hefur framkvæmdastjóri Landssambands kúabænda hafa rekist á gamlar, erlendar nautalundir í verslunum á síðasta ári. Sláturdagur var tilgreindur desember árið 2004 og lundirnar voru því í boði í íslenskum verslunum 20 mánuðum síðar. ,,Hvort mönnum finnst boðlegt að bjóða upp á slíka vöru skal ég ekki segja, en ég er nokkuð viss um að hún er ódýr," segir framkvæmdastóri Landssambands kúabænda.