Telur meirihluta hlynntan virkjunum

Oddviti Skeiða- og Gnúpverjahrepps telur að meirihluti heimamanna sé hlynntur fyrirhuguðum virkjunum í Þjórsá. Hann segir utansveitarfólk hafa verið í meirihluta á fjölmennum fundi í félagsheimilinu Árnesi um síðustu helgi.

Um fjögurhundruð manns fylltu félagsheimili Árnes á sunnudag á baráttufundi sem Náttúruverndarsamtök Suðurlands og Sól á Suðurlandi efndu til gegn þremur virkjunum sem Landsvirkjun áformar í neðri hluta Þjórsár. Oddviti Skeiða- og Gnúpverjahrepps, Gunnar Örn Marteinsson, telur þessa miklu fundarsókn ekki endurspegla afstöðu heimamanna til þessa umdeilda máls enda hafi aðkomufólk verið í meirihluta fundarmanna.

Tvær af þessum þremur virkjunum, Holta- og Hvammsvirkjun, eru nú í skipulagsferli hjá sveitarstjórninni, og hafa menn frest til 1. mars til að gera athugasemdir við auglýsta breytingu á aðalskipulagi. Eftir það mun sveitarstjórn Skeiða- og Gnúpverjahrepps taka afstöðu til þess hvort virkjanirnar verða samþykktar inn á aðalskipulag.