Þrjátíu og tveir hætta á RÚV

Þrjátíu og tveir starfsmenn Ríkisútvarpsins nýttu sér rétt til að fara á biðlaun, við stofnun hlutafélags um útvarpið hinn 1. apríl næstkomandi. Ekki er víst að ráðið verði í allar þessar stöður á nýjan leik.

Starfsfólkið hafði frest fram á föstudag í síðustu viku, til að tilkynna hvort það hygðist notfæra sér biðlaunaréttinn, en alls áttu 116 manns rétt á honum. Samkvæmt heimildum fréttastofu munu nokkur þekkt andlit hverfa af skjánum, þeirra á meðal Ómar Ragnarsson, Katrín Pálsdóttir, Finnbogi Hermannsson og G Pétur Matthíasson fréttamenn. Páll Magnússon útvarpsstjóri segir að 60 prósent þeirra sem nýta sér biðlaunaréttinn séu 60 ára og eldri. Kostnaður útvarpsins vegna þessa er rúmar 90 milljónir króna, en ársvelta þess er um 3,3 milljarðar.

"Og algengast er náttúrlega fólk sem hefði eða mun á biðlaunatímanum ná réttinum til að taka lífeyri. Þannig að það má s.s. líta á það svoleiðiðs, að ef það nýtti sér ekki þennan biðlaunarétt, þá væri það að kauplaust fram að töku lífeyris," sagði útvarpsstjóri.

Páll segir alltaf eftirsjá af góðu fólki sem hafi unnið hjá stofnuninni af miklum heilindum í gegnum tíðina. Framundan sé að endurskoða skipulag útvarpsins, verkhætti og verklag.

"Þannig að það er ekki víst að það þurfi að ráða í allar þessar stöður. Það er yfirferð og gegnumferð sem við eigum eftir að fara," sagði Páll.

Ekki er sjálfgefið að starfsfólki RÚV verði fækkað. "Við munum reyna að auka hérna skilvirkni frá því sem nú er. Og það eru tvær leiðir í því; annað hvort að fá það sama út úr færri starfsmönnum eða meira út úr sama fjölda," sagði Páll Magnússon útvarpsstjóri.