Gerð Helgafellsbrautar hitamál

Gerð Helgafellsbrautar er orðið mikið hitamál hjá íbúum í Mosfellsbæ og sást það glöggt á opnum fundi Varmársamtakanna í gær. Samtökin telja marga þætti ekki hafa verið skoðaða nógu vel og vilja að hætt verði við framkvæmdirnar. Bærinn ætlar að halda opinn fund um málið í næstu viku.

Um eitt hundrað manns komu saman á fundi Varmársamtakanna í Álfafosskvosinni í gær. Á fundinum héldu Jón Baldvin Hannibalsson og Sigrún Pálsdóttir erindi þar sem farið var yfir þær tillögur sem samtökin hafa komið á framfæri við bæjarstjórn Mosfellsbæjar vegna málsins. Samtökin telja að allir þættir framkvæmdanna hafi ekki verið skoðaðir nægjanlega og hafa meðal annars fundað með umhverfisráðherra vegna málsins.

Hjá úrskurðarnefnd skipulags og byggingarmála liggur fyrir kæra þar sem Varmársamtökin óska eftir því að framkvæmdirnar verði stöðvaðar. Ekki er ljóst hvenær úrskurðurinn liggur fyrir en vonast samtökin til að það verði í næstu viku.

Á fundinum kom fram hörð gagnrýni á aðgerðarleysi Vinstri-grænna í umhverfismálum í bænum. Fulltrúi flokksins í bæjarstjórn sat ekki fundinn sökum skamms fyrirvara og tók Ögmundur Jónasson, þingmaður flokksins, við hans sæti í pallborðsumræðum sem fram fóru.

Mosfellsbær sendi frá sér tilkynningu í gær þar sem sagt var að bæjarfulltrúar meirihlutans hefðu ekki séð sér fært að koma fundinn sökum lítils fyrirvara. Í yfirlýsingunni var jafnframt boðað til opins kynningarfundar um hönnun og útfærslu tengivegar inn í Helgafellshverfi. Fundurinn verður þriðjudaginn 13. febrúar í Listasal Mosfellsbæjar.