Hafa heimild til að lengja uppsagnarfrest fangavarða

Fangelsismálastofnun hyggst nýta sér lagaheimild til að lengja uppsagnarfrest fangavarða um sex mánuði haldi þeir uppsögnum sínum til streitu. Um fjörutíu uppsagnarbréf hafa borist stofnuninni.

Áttatíu og tveir fangaverðir eru starfandi á landinu og hefur Fangelsismálastofnun borist uppsagnarbréf frá um helmingi þeirra eða þrjátíu og níu. Fangaverðir eru ósáttir með laun sín og segja að þau séu um þrjátíu prósent lægri en laun lögreglumanna sem er viðmiðunarstétt fangavarða.

Ljóst er að ófremdarástand skapast í fangelsum landsins haldi fangaverðir uppsögnum sínum til streitu. Uppsagnirnar eru frá og með deginum í dag og ef miðað er við þriggja mánaða uppsagnarfrest þá hætta fangaverðir 1. maí næstkomandi.

Í tilkynningu sem dóms- og kirkjumálaráðuneytið hefur sent frá sér segir að fangaverðir fari fram á að launakjör þeirra verði bætt umfram það sem gildandi samningar geri ráð fyrir. Jafnframt segir að af hálfu dóms- og kirkjumálaráðuneytisins og Fangelsismálastofnunar verði beitt þeim lagalegum úrræðum, sem fyrir hendi eru, þegar aðstæður sem þessar skapast.

Valtýr Sigurðsson, fangelsismálastjóri, segir þarna meðal annars vísað til laga um réttindi og skyldur starfsmanna ríkisins. Í þrítugustu og sjöundu grein þeirra laga kemur fram að stjórnvöld geti áskilið sér rétt til lengri uppsagnarfrests eða allt að sex mánuði. Þetta þýðir að hægt er að halda fangavörðunum í starfi til 1. desember. Ljóst er því að nokkur harka er hlaupin í málin en í samtali við fréttastofuna sagði Valtýr að einnig yrði hugað að öðrum lagalegum úrræðum ef á þurfi að halda.