Jesús elskar Ósama

„Jesús elskar Ósama" stendur á skiltum fyrir utan kirkjur í Ástralíu. Þessi fullyrðing hefur vakið reiði hjá sanntrúuðum og kirkjusæknum Áströlum þó að þeir hafi neyðst til að viðurkenna að sennilega sé þetta hárrétt miðað við trúarbókstafinn.

Á einu skiltinu fyrir utan baptistakirkju í miðborg Sidney er svo neðanmálsgreinin: „Jesús sagði: Elskaðu óvini þína og biddu fyrir þeim sem ofsækja þig". John Howard forsætisráðherra landsins er þeirrar skoðunnar að það séu meira áríðandi bænaefni fyrir Ástrali en velferð Osama bin Laden og því eigi áherslan að vera annars staðar.

Forsvarsmenn Baptistakirkjunnar segja að markmiðið með skilaboðunum sé að sýna með afgerandi hætti að Jesús elski alla, jafnvel táknmynd hryðjuverka í heiminum.