Tefja ferðir ráðherra á HM fyrir störfum þingsins?

Spurt var um það á Alþingi hvort ekki væri hægt að taka fyrir fleiri fyrirspurnir á Alþingi vegna þess að ráðherrar streymdu á heimsmeistaramótið í handknattleik.

Það var Kristján L. Möller, þingmaður Samfylkingarinnar, sem vakti athygli á því að 60-70 fyrirspurnum frá þingmönnum væri ósvara og að fáar væru teknar fyrir í dag. Benti hann á að fjölmargir ráðherrar væru fjarverandi og að á íþróttasíðum mætti lesa að þeim fjölgaði á HM. Spurði hann hverju þetta sætti.

Jón Kristjánsson, starfandi þingforseti, sagði ekki gott mál að svo margar fyrirspurnir biðu en benti á að ástæðan fyrir því væri bæði fjarvera ráðherra og þingmanna.

Spurði Mörður Árnason, flokksbróðir Kristjáns, þá hvaða ráðherrar hefðu tilkynnt fjarveru sýna og hvaða ástæður væru fyrir því. Hann teldi að vissu leyti eðilegt að menntamálaráðherra, sem væri ráðherra íþróttamála, væri viðstaddur stórviðburði í útlöndum tengdum Íslandi en benti jafnframt á að sést hefði til Valgerðar Sverrisdóttur utanríkisráðherra leik Íslendinga og Dana í sjónvarpi í gær.

Jón Kristjánsson sagðist hins vegar ekki hafa upplýsingar um fjarveru ráðherra en sagði auðvelt að afla þeirra.

Fleiri þingmenn stjórnarandstöðu stigu í pontu og bentu á að ráðherrar hefðu sagt að greiða þyrfti fyrir þingstörfum vegna þess hve starfstími þess væri stuttur þetta vorið en ráðherrar leggðu ekki sitt lóð á vogarskálarnar með því að svara ekki fyrirspurnum.