Saka bæjarstjóra um að taka þátt í kosningabaráttu Alcan

Samtökin Sól í Straumi, sem berjast gegn stækkun álvers Alcan í Straumsvík, saka Lúðvík Geirsson, bæjarstjóra í Hafnarfirði, um að vera í grímulausri kosningabaráttu með Alcan fyrir stækkun álversins og sömuleiðis um að fara með ósannindi í umræðunni.

Í yfirlýsingu frá samtökunum er vísað til blaðamannafundar bæjaryfirvalda í Hafnarfirði í gær þar sem deiliskipulag vegna stækkunar álversins var kynnt. Segja samtökin það hneykslanlegt að bæjarstjórinn taki undir staðhæfulausa hótun Alcan um að verskmiðjunni verði lokað ef álverið verði ekki stækkað.

Bæjarstjórinn viti að 70 prósent af öllum álverum Alcan séu minni en 200 þúsund tonn að sú stærð sé og verði hagkvæm á Íslandi a.m.k. næsta áratuginn.

Þá mótmæla samtökin því að með nýjum deiliskipulagstillögum sé verið að draga stórlega úr mengun frá álverinu við stækkunina. Samkomulag Alcan við bæinn feli aðeins í sér markmið um brennisteinsmengun sem reyna á "eftir megni" að draga úr.

Þá segja forsvarsmenn Sólar í Straumi að sjónmengun aukist til muna með stækkuninni og sömuleiðs loftmengun. Svifryk frá álverinu muni aukast um 250 prósent á sólarhring og sama megi segja um flúoríðs- og brennisteinsdíoxíðsmengun

Þetta séu losunarheimildir samkvæmt starfsleyfi. Yfirlýsingar um að "stefna beri að eftir megni" að minnka brennisteinsmengun frá álverinu gefi engin tilefni til þeirra yfirlýsinga sem bæði Lúðvík og Rannveig Rist, forstjóri Alcan, hafi látið falla í fjölmiðlum í gær.

Þá benda samtökin á að mengunarsvæðið sem er í dag 10 ferkílómetrar verði ónýtt sem byggingarsvæði svo lengi sem álverið sé í rekstri. Nýir útreikningar á stærð svæðisins breyti engu þar um.