Látum Larsson ekki eyðileggja fyrir okkur aftur

Cesc Fabregas, miðvallarleikmaður Arsenal, segir ekki koma til greina að láta sænska markaskorarann Henrik Larsson endurtaka leikinn frá í úrslitaleik Meistaradeildarinnar í fyrra þegar sá sænski átti stóran þátt í sigri Barcelona á Arsenal. Liðið tekur á móti Manchester United í ensku úrvalsdeildinni í dag klukkan 16.

"Henrik Larsson er maðurinn á bak við nokkrar af okkar verstu minningum eftir frammistöðu hans í úrslitaleiknum í Meistaradeildinni og við ætlum að tryggja það að slíkt komi ekki fyrir aftur. Ég held samt að Manchester United sé líklegast til að verða enskur meistari - burtséð frá því hvað verður í leik okkar við þá í dag. United er að spila betur en Chelsea og Chelsea verður að gera breytingar ef liðið ætlar sér stóra hluti, því það þýðir ekki að vinna titla á frábærum einstaklingum - sigrar vinnast á liðsheildinni," sagði Spánverjinn.