Koma David Beckham gríðarlega þýðingarmikil

Don Garber, forseti bandarísku atvinnumannadeildarinnar í knattspyrnu, segir ekki hægt að mæla mikilvægi þess að David Beckham muni spila í deildinni á næstu leiktíð. Hann segir þetta stórt skref í framþróun deildarinnar og knattspyrnu í Bandaríkjunum í heild.

"Það að David Beckham sé að koma í MLS deildina gæti í augum sumra verið mikilvægasti atburður í sögu knattspyrnu í landinu - og kannski mikilvægasti atburður í sögu atvinnuíþrótta í landinu. David er auðvitað eitt mest áberandi nafnið í knattspyrnuheiminum og einn þekktasti íþróttamaður í heiminum og því er fólk vitanlega spennt að hann skuli vera að koma hingað til að ljúka ferlinum," sagði Garber.