Fagnar fyrirhuguðum Vaðlaheiðargöngum

Undirbúningsfélag um Vaðlaheiðargöng fagnar því að ríkisvaldið hafi ákveðið viðræður við heimamenn um gerð ganganna. Ljóst er þó að göngin verða ekki tilbúin fyrr en 2011-2012.

Pétur Þór Jónasson stjórnarformaður hjá Greiðri leið, undibúningsfélagi um Vaðlaheiðargöng, fagnar þeim áfanga sem náðist í gær þegar Sturla Böðvarsson samgönguráðherra kynnti samgönguáætlun. Þar segir að 300 milljónum verði varið á næstu þremur árum af hálfu ríkisins til að undirbúa gerð ganganna og fyrstu viðræður milli ríkis og heimamanna eru komnar á dagskrá.

Göngin verða grafin sem einkaframkvæmd og vegtollur innheimtur. Þau stytta þjóðleiðina austur frá Akureyri um 16 kílómetra og með þeim verður vegatálminn Víkurskarð úr sögunni, en þar er oft illviðrasamt. Hitt er ljóst að þótt allt gangi upp verður enn nokkur bið á að fyrstu bílarnir fari í gegnum Vaðlaheiðargöng.