Tevez fékk rautt í fyrsta tapi Argentínu

Argentínumenn töpuðu í gærkvöld sínum fyrsta leik í Suður-Ameríkuriðli undankeppni HM þegar liðið lá 2-1 fyrir Kólumbíu. Carlos Tevez fékk að líta rauða spjaldið eftir aðeins 25 mínútur í leiknum.

Lionel Messi kom Argentínu yfir í leiknum en Tevez var svo vikið af leikvelli fyrir að sparka í andstæðing sinn þegar boltinn var víðsfjarri. Heimamenn jöfnuðu leikinn í síðari hálfleik með aukaspyrnu Ruben Dario Bustos og svo skoraði varamaðurinn Dayro Moreno sigurmarkið sjö mínútum fyrir leikslok. Báðir markaskorarar Kólumbíu fengu gult spjald fyrir að fara úr treyjum sínum í fagnaðarlátunum.

Argentínumenn eru þrátt fyrir tapið enn í efsta sæti riðilsins með 9 stig eftir 4 leiki en Kólumbíumenn hafa 8 stig í öðru sæti.