Ofsakastur rannsakaður sem almannahættubrot

Lögreglan á höfuðborgarsvæðinu rannsakar mál tveggja ökuníðinga sem létu til sín taka um síðustu helgi sem almannahættubrot og þannig brot á hegningarlögum en ekki umferðarlögum. Við slíkum brotum er allt að tveggja ára fangelsi. Lögreglustjóri segir tíma til kominn að segja hingað og ekki lengra.

Lögregla hefur lýst eftir vitnum að ofsaakstri mannanna tveggja í borginni um helgina, en annar átti sér stað á föstudagskvöld og hinn aðfararnótt laugardagsins. Segir lögregla að allar umferðarreglur hafi verið þverbrotnar en báðir ökumenn eru grunaðir um ölvunarakstur.

„Við teljum að þessi brot séu alvarleg og við rannsökum þau meðal annars til að kanna hvort þarna hafi verið framið brot á hegningarlögum, almannahættubrot," segir Stefán Eiríksson, lögreglustjóri á höfuðborgarsvæðinu. „Þetta eru auðvitað mjög alvarlegir atburðir. Þarna var stórum hópi fólks og lögreglumönnum stefnt í mikla hættu og að okkar mati er tími til kominn að segja hingað og ekki lengra," segir Stefán enn fremur.

Unnið er að málinu með ríkissaksóknara sem ákærir í málinu ef til kemur.