Lýst eftir vitnum að ofsaakstri tveggja manna

Lögreglan á höfuðborgarsvæðinu lýsir eftir vitnum að ofsaakstri tveggja ökumanna um síðustu helgi en hún segir að þá hafi nánast allar umferðarreglur verið þverbrotnar.

Öðrum var veitt eftirför um fjölmargar götur borgarinnar frá klukkan 22.40 á föstudagskvöld. Sá ók gráum Hyundai Elantra en leið hans lá m.a. um Miklubraut, Skeiðarvog, austur Suðurlandsbraut, Sæbraut, Reykjanesbraut, Smiðjuhverfi í Kópavogi, Stekkjarbakka, Höfðabakka, Arnarbakka, Álfabakka, Reykjanesbraut og Sæbraut að gatnamótum Súðarvogs þar sem lögreglan stöðvaði för hans.

Ökumaðurinn, 21 árs karlmaður, hefur ítrekað gerst sekur um umferðarlagabrot en hann var auk þess með útrunnið ökuskírteini. Með honum í bílnum voru tveir piltar, báðir 18 ára.

Hinum ökumanninum var veitt eftirför á fimmta tímanum aðfaranótt laugardags. Sá ók ljósgráum Mercedes Benz en leið hans lá um Suðurlandsveg, Breiðholtsbraut og Reykjanesbraut að Mjódd þar sem lögreglan stöðvaði för hans. Ökumaðurinn, 21 árs karlmaður, hefur nokkrum sinnum áður gerst sekur um umferðarlagabrot.

Báðir ökumennirnir eru jafnframt grunaðir um ölvunarakstur. Þeir voru yfirheyrðir um helgina. Annar bar við minnisleysi en hjá hinum var líka fátt um svör. Með háttalagi sínu stefndu þeir sjálfum sér og öðrum í mikla hætta en brot þeirra geta varðað allt að 6 ára fangelsi.

Þeir sem geta gefið upplýsingar um málin eru beðnir að hafa samband við lögregluna á höfuðborgarsvæðinu í síma 444-1000. Sérstaklega er óskað eftir að ökumaður hvítrar Mercedes Benz sendibifreiðar gefi sig fram. Sá ók Breiðholtsbraut á sama tíma og annar ökufantanna var þar á ferð.