Mido skrifar undir hjá Middlesbrough

Egypski framherjinn Mido hefur skrifað undir fjögurra ára samning við Middlesbrough. Middlesbrough borgar Tottenham sex milljónir punda fyrir þennan 24 ára gamla leikmann. Mido gæti þreytt frumraun sína með félaginu gegn Fulham um helgina.

„Ég spilaði gegn honum sem leikmaður og þá heillaði han mig, " segir Gareth Southgate, knattspyrnustjóri Middlesbrough. „Hann er með góða tækni og er mikill markaskorari. Þegar maður er með mann sem getur gefið frábærar sendingar fyrir markið eins og Stuart Downing vill maður líka hafa mann eins og Mido til að klára færin."