Dunga velur landsliðshóp Brassa

Dunga, landsliðsþjálfari Brasilíu í knattspyrnu, hefur valið leikmannahóp sinn sem mætir Perú og Úrúgvæ í undankeppni HM í næsta mánuði.

Dunga ætlar að þétta hjá sér varnarleikinn í þessum verkefnum og hefur gefið það út að hann ætli að stilla þeim Juan hjá Roma og Lucio hjá Bayern Munchen upp í hjarta varnarinnar.

"Mér sýnist á öllu að þeir séu heppilegasta miðvarðaparið okkar en það er auðvelt að finna 10 eða 15 góða varnarmenn í úrvali okkar, því allir sem ég hef prófað hafa komið nokkuð vel út," sagði Dunga.

"Brasilíska landsliðið hefur ekki alltaf verið þekkt fyrir góðan varnarleik og markvörslu, en það stendur allt til bóta hjá okkur að mínu mati," sagði þjálfarinn.

Brasilíumenn hafa ekki fengið á sig mark í síðustu þremur landsleikum og eru farnir að skora grimmt á ný eftir magra tíð í þeim efnum. Liðið gerði 0-0 jafntefli við Kólumbíu í fyrsta leik sínum í undankeppninni en burstaði svo Ekvador 5-0.

Dunga hefur nú tilkynnt hópinn fyrir næstu tvo leiki og þar gerir hann aðeins eina breytingu frá síðasta leik - Nando frá Werder Bremen kemur inn í hópinn í stað Alex Silva frá Sao Paulo. Þar með er Kleber frá Santos eini heimamaðurinn í hópnum.

Markverðir: Julio Cesar (Internazionale), Doni (Roma).

Varnarmenn: Maicon (Internazionale), Daniel Alves (Sevilla), Alex Costa (Chelsea), Juan (Roma), Lucio (Bayern Munich), Gilberto (Hertha Berlin), Kleber (Santos), Naldo (Werder Bremen).

Miðjumenn: Gilberto Silva (Arsenal), Josue (Wolfsburg), Mineiro (Hertha Berlin), Fernando (Bordeaux), Diego (Werder Bremen), Elano (Manchester City), Kaka (AC Milan), Julio Baptista (Real Madrid).

Sóknarmenn: Robinho (Real Madrid), Ronaldinho (Barcelona), Vagner Love (CSKA Moscow), Afonso (Heerenveen)