DV braut alvarlega gegn siðareglum BÍ

Siðanefnd Blaðamannafélags Íslands hefur komist að því þeirri niðurstöðu að DV hafi brotið alvarlega gegn siðareglum félagsins í umfjöllun um karlmann í blaðinu fjóra daga í ágúst og september síðastliðnum.

Fram kemur í úrskurðinum að í fyrstu greininni í DV hafi maðurinn verið sakaður um andlegt og líkamlegt ofbeldi í fyrirsögn og fjallað um deilur á milli hans og fyrrverandi eiginkonu í forræðismáli. Þá voru í greininni rifjaðar upp sex ára gamlar ásakanir á hendur kæranda, sem er forstöðumaður meðferðarheimilis fyrir ungt fólk á Laugalandi, en hann hefði verið hreinsaður af þeim.

Þremur dögum síðar birti blaðið athugasemd frá forstjóra Barnaverndarstofu sem sagði fullyrðingar um ofbeldi mannins gagnvart eigin börnum, fyrrverandi eiginkonu og börnum á Laugalandi vitleysu. DV fjallaði svo aftur um málið tvisvar skömmu síðar og rifjaði þá upp sex ára gamlar sakargiftirnar.

Taldi kærandi að blaðamaður hefði í umfjöllun sinni brotið gegn siðareglum BÍ með því að hafa sýnt tillitsleysi í umfjöllun um málefni fjölskyldu mannsins og með því að birt ítrekaðar ásakanir um harðræði sem hann hefði verið hreinsaður af.

Siðanefnd BÍ komst að því að maðurinn þyrfti að sætta sig við opinbera umfjöllun um störf sín þótt gera yrði kröfu um sanngirni. Sérstöku máli gegndi hins vegar um persónuleg málefni mannsins, fyrrverandi eiginkonu hans og barna þeirra. Vægðarlaus umfjöllun um deilumál fjölskyldu hans ættu og persónulegan harmleik ætti ekkert erindi í fjölmiðla. „Í því efni breytir engu þótt frásögnin sé höfð eftir þriðja aðila. Umfjöllunin jafngildir nafnbirtingu bæði konunnar og barna þeirra og er til þess fallin að skaða saklaust fólk" segir í niðurstöðu siðanefndar.

Þá segir siðanefndin að fullyrðingar um meinta líkamsárás mannsins gagnvart systur hans virðist tilhæfulausar og sama gildi um meintan fjárdrátt mannsins á skattfé. Segir siðanefndin að fyrsta frétt blaðsins af málinu hafi verið óvönduð og þar víða pottur brotinn. DV hafi dregið nokkuð í land með athugasemdum sem birtar eru í næstu umfjöllun en þær dugi hvergi nærri til þess að rétta hlut mannsins.

„Það sem eftir stendur eru annars vegar einkamálefni kæranda og fjölskyldu hans sem borin eru á torg án þess að séð verði hvaða erindi þau eigi í fjölmiðla og hins vegar þungar ásakanir um líkamsárás og skattamál. Auðveldlega hefði mátt afla nákvæmari og réttari upplýsinga um þau mál," segir í úrskurði siðanefndar sem telur brot DV alvarlegt.