Allir geta spilað löngum boltum fram

Thomas Beck var hetja Liechtenstein í gær er hann skoraði tvö mörk gegn Íslandi eftir að hafa komið inn á sem varamaður.

„Þetta er ótrúleg tilfinning,“ sagði Beck í samtali við dagblaðið Volksblatt í Liechtenstein. „Þó ég sé ánægður með mörkin sem ég skoraði er ég enn ánægðari fyrir hönd liðsins.“

Honum fannst ekki mikið til leik íslenska liðsins koma.

„Allir geta spilað löngum boltum fram á völlinn.“

Emil Hallfreðsson sagði í viðtali við sama blað að hann væri nánast orðlaus.

„Ég veit ekki hvernig ég á að útskýra hvað gerðist. Á venjulegum degi eigum við að vinna hér en þetta er svartur dagur í okkar sögu.“