Bjartsýnustu mönnum hefði ekki dreymt fyrir þessum úrslitum

Knattspyrnuáhugamenn í dvergríkinu Liechtenstein eru nú í skýjunum eftir 3-0 sigur á Íslandi í undankeppni EM 2008 í gær.

„Jafnvel bjartsýnustu menn hefðu ekki leyft sér að dreyma fyrir þessum úrslitum," sagði í umfjöllun dagblaðsins Volksblatt um leikinn. Þetta var stærsti heimasigur Liechtenstein í sögu undankeppni Evrópumótsins.

„Leikmenn Liechtenstein unnu nánast öll návígi og urðu Íslendingar helst að brjóta á þeim til að stöðva þá. Það er ekki á hverjum degi sem liðið vinnur slíkan yfirburðasigur og ber að fagna því," sagði greinarhöfundur.

Bidu Zaugg, landsliðsþjálfari Liechtenstein, tók í svipaðan streng. „Ég er afar stoltur af strákunum í dag."