Chelsea í úrslit deildarbikarsins

Chelsea sigruðu Wycombe næsta örugglega í seinni undanúrslitaleik liðanna í enska deildarbikarnum í kvöld 4-0. Andriy Shevchenko skoraði fyrstu tvö mörk Englandsmeistaranna, en Frank Lampard innsiglaði sigurinn með tveimur mörkum í seinni hálfleik.

Wycombe náðu jafntefli við Englandsmeistarana í fyrri leiknum á heimavelli sínum og geta sannarlega unað vel við sitt þó þeir hafi fallið úr leik enda leikur liðið í fjórðu efstu deild á Englandi.

Í hinni undanúrslitarimmunni mætast erkifjendurnir í Tottenham og Arsenal en fyrri leikur liðanna fer fram annað kvöld og verður í beinni útsendingu á Sýn.