Þrettán borgarar sagðir látnir eftir loftárás NATO í Afganistan

Þrettán borgarar létust í loftárás hersveita NATO í suðurhluta Afganistans í gær. Frá þessu greindi afganska lögreglan en talsmenn NATO segja aðeins uppreisnarmenn talibana hafa fallið í árásinni.

Sextán uppreisnarmenn eru sagðir hafa fallið í árásunum sem gerðar voru í Helmand-héraði nokkrum klukkustundum eftir að NATO greindi frá því að hermenn bandalagsins hefðu ásamt afgönskum hermönnum fellt um 150 talibana sem komu yfir landamærin frá Pakistan. Aðeins eru þrír mánuðir síðan ríflega 30 borgarar létust í loftárás NATO í Kandahar-héraði en talsmaður NATO kenndi þar um lélegum samskiptum milli bandalagsins og afganskra yfirvalda.