Flugskeyti skotið á sendiráð Bandaríkjanna í Aþenu

Flugskeyti var í morgun skotið á sendiráð Bandaríkjamanna í Aþenu í Grikklandi án þess þó að nokkurn sakaði. Eftir því sem haft er eftir grísku lögreglunni var því skotið úr húsi beint á móti sendiráðinu og lenti skeytið á salerni á þriðju hæð sendiráðsins.

Tugir lögreglubíla umkringdu sendiráðið og nálægum götum var lokað. Þriggja metra há stálgirðing er allt í kringum sendiráðið og þá gæta öryggisverðir allra innganga. Lögreglumenn úr andhryðjuverkasveit grísku lögreglunnar voru strax kallaðir á vettvang en ekki liggur fyrir hver stóð á bak við tilræðið.