Lögreglan leitar skuldseigra

Lögreglan á höfuðborgarsvæðinu liðsinnir nú sýslumanninum í Reykjavík í sérstöku átaki sem stendur yfir um þessar mundir. Það er tilkomið vegna fjölmargra krafna um fjárnám sem ekki hefur tekist að ljúka.

Fram kemur í tilkynningu frá lögreglu að að þrátt fyrir ítrekaðar tilraunir sýslumanns séu margir sem hunsa algjörlega allar boðanir og skipti þá engu þótt stefnuvottar hafi náð til viðkomandi. Þeir sem hafa fram til þessa ekki sinnt boðunum sýslumanns eru hvattir til að gera hreint fyrir sínum dyrum hið snarasta. Að öðrum kosti verði þeir sóttir af lögreglu hvar sem til þeirra næst og færðir til sýslumanns.