Erdogan vill boða til kosninga

Forsætisráðherra Tyrklands hefur farið þess á leit við þing landsins að boðað verði til kosninga fyrr en áætlað er. Hann vill einnig breyta stjórnarskrá Tyrklands þannig að forseti verði valinn af almenningi með beinni kosningu en ekki af þingi.

Það var úr vöndu að ráða fyrir Tayyip Erdogan, forsætisráðherra, í gær þegar stjórnlagadómstóll ógilti atkvæðagreiðslu þings í síðustu viku um næsta forseta landsins. Eini frambjóðandinn, Abdullah Gul, utanríkisráðherra og flokksbróðir Erdogans, hlaut ekki næg atkvæði og því þurfti að greiða aftur atkvæði í þessari viku. Stjórnarandstaðan var andvíg valinu og skaut málinu til dómstólsins sem úrskurðaði í gær. Áhyggur stjórnarandstæðinga og margra annarra Tyrkja voru þær að með valinu á Gul, sem er afar trúaður múslimi líkt og flokksbræður hans, yrðu skil milli stjórnmála og trúarbragða í landinu óljósari. Stjórnmálaskýrendur sögðu að miðað við úrskurðinn hefði Erdogan tvo kosti. Hann gæti skipt Gul út fyrir annað forsetaefni eða boðað til kosninga, líkt og stjórnarandstaðan gerði kröfu um. Erdogan tilkynnti síðan í gærkvöldi að hann hefði óskað eftir stuðningi þings við ákvörðun sína um að boða til kosninga í lok júní. Hann sagði úrskurð stjórnlagadómstólsins árás á lýðræðið og nú teldi hann mikilvægt að breyta stjórnarskrá landsins þannig að Tyrkir fengju að velja forseta beinni kosningu.

Deilurnar um valið á Gul hafa svipt hulunni af djúpstæðum klofningi í Tyrknesku þjóðfélagi, milli strangtrúaðra og þeirra sem vilja halda trú og stjórnmálum aðskildum.