Tilþrifalítill sigur Englendinga - Owen meiddur

Englendingar lögðu Austurríkismenn 1-0 í æfingaleik þjóðanna í knattspyrnu í kvöld. Sigur Englendinga var ekki sérlega glæsilegur en Peter Crouch skoraði sigurmarkið með skalla á síðustu mínútu fyrri hálfleiksins.

Meiðsli framherjans Michael Owen skyggðu enn frekar á dapurt kvöld frá enskum, en hann haltraði af velli í fyrri hálfleik meiddur á læri og missir væntanlega af leiknum mikilvæga við Króatíu í næstu viku fyrir vikið.

Englendingar eiga veika von um að komast á EM næsta sumar en til þess þarf liðið að vinna Króata í næstu viku og treysta á að Rússum verði á í messunni í Ísrael á morgun.