Barna­barn Idi Amin dæmt úr leik fyrir að skalla and­stæðing

Abdul mætti Englendingnum Damar Thomas í átta manna úrslitum í ofurþungavigt á Samveldisleikunum.

Í 3. lotu virtist Adbul skalla Thomas þegar þeir glímdu í hringnum. Hann var í kjölfarið dæmdur úr leik og Thomas komst því áfram í undanúrslit. Abdul fannst illa að sér vegið og taldi fordóma liggja að baki ákvörðuninni að dæma hann úr leik.

„Þegar þú horfir á fyrri bardaga enskra boxara búa þeir til mikla snertingu. Ég náði góðu höggi á hann en það taldi ekki. Í staðinn drógu þeir stig af mér. Ég er svartur Afríkumaður en hann er heimamaður,“ sagði hinn 25 ára Abdul.

Áður en hann var dæmdur úr leik hafði hann fengið viðvaranir og var undir á stigum hjá dómurum bardagans.

„Það eina sem ég get sagt er að ákvörðunin er ekki rétt. Ég er ekki sáttur. Hann gaf mér olnbogaskot. Þetta var óvart hjá mér. Hvernig gat ég skallað einhvern? Ég myndi ekki gera það. Hann var sá sem vildi vinna. Hann var sigurvegari fyrir. Ég vissi að ef ég næði ekki að rota hann myndi ég ekki vinna bardagann,“ sagði Abdul.

Fyrir bardagann sagðist Abdul ætla að verða nýr Skotakonungur og vísaði þar í orð afa síns sem var hugfanginn af Skotlandi. The Last King of Scotland er svo nafn á kvikmynd um Amin frá 2006. Þar fór Forest Whitaker með hlutverk Amins og fékk Óskarsverðlaun fyrir frammistöðu sína. 

Abdul hitti Amin reyndar aldrei en hann dó örfáum árum eftir að Abdul fæddist. Amin réði ríkjum í Úganda á árunum 1971-79 en talið er að í stjórnartíð hans hafi allt að hálf milljón manns verið myrt.

Líkt og Abdul var Amin boxari. Hann var úgandskur meistari í léttþungavigt á árunum 1951-60.