Íslendingar þrettánda mesta fiskveiðiþjóð heims

Íslendingar eru þrettánda mesta fiskveiðiþjóð heims eftir því sem fram kemur í riti frá Hagstofu Íslands. Samkvæmt tölunum nam heimsaflinn um 95 milljónum tonna árið 2004 og jókst um 4,8 milljónir frá árinu 2003.

Tuttugu ríki voru með afla yfir einni milljón tonna árið 2004 og nam samanlagður afli þessara ríkja tæpum 69 milljónum tonna eða þremur fjórðu af heimsaflanum. Aflahæsta þjóðin er sem fyrr Kínverjar með 16,9 milljónir tonna eða 17,8 prósent aflans en næstir koma Perúmenn með 9,6 milljónir tonna eða 10,1 prósent. Íslendingar hafna sem fyrr segir í 13. sæti á þessum lista með 1,8 prósent heildaraflans og falla þar með um eitt sæti frá árinu 2003.

Hagstofan greinir enn fremur frá því að Kyrrahafið hafi gefið mestan afla árið 2004 eða ríflega helming aflans. Þá var Perúansjósa langmest veidda tegundin það ár en nærri 11 milljónir tonna veiddust af henni.

Þá leiða tölur Hagstofunnar enn fremur í ljós að afli erlendra ríkja við Ísland nam tæpum 74 þúsund tonnum árið 2004 og jókst í 114 þúsund tonn 2005. Uppistaða aflans var sem fyrr loðna. Norðmenn veiddu mest erlendra þjóða hér við land 2005 en Færeyingar árið 2004.