Ekki hægt að takmarka fjölda útlendinga

Michel Platini, forseti Knattspyrnusambands Evrópu, segir að ekki sé fræðilegur möguleiki að tillögur Alþjóða Knattspyrnusambandsins um takmörkun útlendinga í liðum Evrópu nái fram að ganga.

FIFA hefur lagt fram tillögu um að koma á reglum í knattspyrnunni þar sem fjöldi útlendinga í félagsliðum yrði takmarkaður og að minnsta kosti sex uppaldir leikmenn þyrftu að vera í hverju liði. Hugmyndin var að þetta tæki gildi árið 2010. Platini segir þetta alls ekki hægt.

"Ekki möguleiki," sagði Frakkinn í samtali við Sky sjónvarpsstöðina. "Reglurnar í Evrópu eru skýrar og þar mega menn vinna hvar sem þeir vilja samkvæmt evrópskum reglum. Það er ekki möguleiki að koma svona reglum á í álfunni," sagði Platini.