Chelsea missir af undrabarni

AC Milan hefur klófest brasilíska undrabarnið Alexandre Pato sem um langt skeið hefur verið eitt eftirsóttasta ungstirnið í knattspyrnuheiminum. Chelsea var lengi á höttunum eftir piltinum sem er 17 ára gamall og kemur frá Internacional Porto Alegre.

Kaupverðið er sagt vera 15.5 milljónir punda fyrir fimm ára samning. Pato byrjar að æfa með Milan þann 3. september en vegna reglna á Ítalíu mun hann ekki fá að spila með aðalliðinu fyrr en hann verður 18 ára.

Pato var um nokkurt skeið einn eftirsóttasti ungi framherji í heimi. Auk Chelsea voru Real Madrid og Inter Milan tilbúin að reiða fram háar upphæðir fyrir drenginn.

Jose Morinho, þjálfari Chelsea, hefur nokkrum sinnum tjáð sig opinberlega um Pato og líst yfir hrifningu sinni á leikmanninum. Það mun því líklega hafa verið nokkuð áfall að missa drenginn til Ítalíu.