Real kaupir Robben

Arjen Robben er genginn til liðs við Real Madrid. Þessu halda spænskir fjölmiðlar fram í dag. Robben verður kynntur fyrir stuðningsmönnum liðsins seinna á morgun ásamt Royston Drenthe sem Real keypti á dögunum.

Robben hefur verið orðaður við Real í nokkurn tíma. Faðir hans, Hans Robben, sem er umboðsmaður leikmannsins hefur verið í Madrid síðustu daga til að semja um kaup og kjör fyrir soninn.

Því er haldið fram að 22.5 milljónir punda sé kaupverðið sem Real Madrid þurfi að leggja fram fyrir Hollendingin sem virtist búinn að tapa byrjunarliðssæti sínu til Frakkans Florent Malouda.

Frá því hefur verið greint að Jose Mourinho, þjálfari Chelsea, hafi helst viljað halda Robben hjá liðinu. Hann getur þó í staðinn huggað sig við það að hagnaðinn af Robben söluni sé hægt að nota til að kaupa bakvörðinn Daniel Alves frá Sevilla sem Mourinho hefur lengi verið á höttunum eftir.