Samfylkinguna hungrar í sigur í vor

Núverandi stjórnarflokkar hafa eyðilagt velferðarkerfið, sem jafnaðarmenn voru í forystu um að byggja upp, og það þarf jafnaðarmenn til að endurreisa það, sagði Ingibjörg Sólrún Gísladóttir á fjölmennum fundi flokksins um málefni aldraðra í dag. Hún sagði öll lið í keppni hungra í sigur og Samfylkinguna hungraði í sigur í kosningunum í vor.

Ingibjörg Sólrún fór yfir stefnumál Samfylkingarinnar í málefnum aldraðra á fundi með 60 plús hópi flokksins á yfir 300 manna fundi á Nordica í dag. Þar brýndi hún flokksmenn til baráttu fyrir kosningarnar í vor, sem hún líkti við keppnisleik.

"Það er alltaf þannig að liðið sem er að keppa á vellinum verður að hungra í sigur. Og okkur í Samfylkingunni hungrar í sigur. En liðið þarf líka að vita að það á öflugt félag á bakvið sig, öfluga stuðningsmenn og það eigium við í Samfylkingunni og eins og ég sagði - okkur langar svo að vinna sigur fyrir ykkur," sagði Ingibjörg Sólrún.

Ingibjörg sagði að nú væru 900 einstaklingar í sambúð með ókunnugum á dvalarheimilum landsins og 70 biðu á Landsspítalnum eftir að komast í aðra vist. Þetta fólk ætti lítið einkalíf. Hún sagðist hafa einsett sér það frá upphafi borgarstjóratíðar sinnar að byggja upp leikaskóla og skóla og það hefði gengið eftir. Það sama myndi gerast með málefni eldri borgara.

Ingibjörg Sólrún sagði að í borgarstjóratíð sinni hafi hún hugsað mér sér að hún ætlaði sér ekki að vera eins og fyrirrennari hennar í embætti. "Sem byggði sér minnisvarða í formi ráðhúss og Perlu, ég vildi að mínir minnisvarðar yrðu í hverfum borgarinnar í formi skóla og leikskóla," sagði formaður Samfylkingarinnar.

Og svo fór hún yfir áherslur Samfylkingarinnar. Hækka ætti lífeyri almannatrygginga, lækka skatt á lífeyristekjur úr 36 % í 10 % og hækka frítekjumark í 100 þús, auk þess að afnema skerðingu bóta vegna tekna maka og hækka skattleysismörk. Það hafi verið jafnaðarmenn sem beittu sér fyrir almannatryggingakerfinu og það verði þeirra að endurreisa það. En stjórnarflokkarnir muni líka koma til kjósenda með loforð fyrir kosningar.

"Þó þeir geti ekki fengið þá til að kjósa sig út á vanrækslusindirnar sem þeir hafa verið með á undanförnum árum. Og það eru alltaf vanrækslusindirnar sem eru verstar. Þeir hafa haft tólf ár til að takast á við þetta og þeir hafa ekki gert það. Það er kominn tími til þess að gefa þessu fólki frí og við skulum gera það," sagði Ingibjörg Sólrún.