Klámsíðueigandi fyllist hryllingi

Vestur-Íslendingur, sem hefur skráð sig á samkomu vefstjóra klámheimasíðna á Íslandi í næsta mánuði, segist fyllast hryllingi vegna þess fréttaflutnings sem verið hefur um samkomuna í íslenskum fjölmiðlum. Hann er hneykslaður á ummælum talskonu Stígamóta, borgarstjórans í Reykjavík og viðskiptaráðherra og minnir á að þau kunni að þurfa að standa við ásakanir um barnaklám og þrælahald fyrir dómstólum.

Tveir þeirra sem hafa skráð sig í ferð netstjóra klámsíðna til landsins bera eftirnafnið Hjorleifsson. Annar þeirra, Scott Hjorleifson er Vestur Íslendingur, og hefur skrifað Stöð tvö og segist fyllast viðbjóði við að lesa fréttir frá Íslandi vegna þessa máls. Í fyrsta skipti skammist hann sín fyrir íslenskan uppruna sinn.

Hann segir að ef það reynist rétt að opinberir aðilar hafi sett fram ásakanir um að fulltrúar á ráðstefnunni standi fyrir barnaklámi og þrælahaldi, verði þeir að gera sér grein fyrir að um ærumeiðingar sé að ræða sem varði við lög. Engu líkara sé en þessir aðilar hafi misst vitið eða séu drukknir.

Hjorleifson segist hafa sótt sex samkomur sem þessar og þar hafi einfaldlega komið saman fólk til að skemmta sér í fríi og kynnast hvort öðru. Það sé út í hött að tengja vefstjóra heimasíðna þar sem í boði sé klám með fullorðnu fólki sem hafi samþykkt að sitja fyrir, við barnaklám og þrælahald. Þetta byggi ekki á neinu öðru en fordómum.

Þá standi ekki til að framleiða klámefni í Íslandsferðinni, enda sé dýrt að flytja leikara og búnað sem til þarf til landsins. Framleiðendur fullorðinskláms kjósi frekar að framleiða efni sitt í löndum sem það er löglegt. Flestir þeirra sem ætluðu sér til Íslands vinni að markaðsmálum og komi hvergi nálægt framleiðslunni. Mikið hefur verið rætt um þetta mál á erlendum spjallþræði og þar kemur fram að all nokkrir sem ætluðu sér í ferðina til Íslands, hafa hætt við það.