Mikill munur á afstöðu karla og kvenna í skoðanakönnunum

Miklu munar á afstöðu karla og kvenna í þeim skoðanakönnunum sem hafa verið gerðar á fylgi flokkanna fyrir alþingiskosningarnar í vor. Einar Mar Þórðarson stjórnmálafræðingur hefur reiknað út að munur á afstöðu kynjanna til flokka ráðist af því hvort konur séu í forsvari flokkanna og sé hlutfallslega mestur hér í samanburði við önnur Norðurlönd.

Samkvæmt nýjustu könnun Capacent á fylgi flokkanna fyrir Ríkisútvarpið ætla 63 prósent karla að kjósa Sjálfstæðisflokk, Framsóknarflokk eða Frjáslynda en einungis 40 prósent kvenna. Helmingur kvenna ætlar að kjósa Samfylkinguna eða Vinstri - græna en einungis 36 prósent karla.

Einar Mar Þórðarson bendir á á heimasíðu sinni að í síðustu alþingiskosningum hafi þrjátíu og átta prósent kvenna kosið Samfylkinguna en einungis tuttugu og fimm prósent karla. Hann segir að það virðist vera sem ein skýringin á fylgistapi Samfylkingarinnar sé sú að hún sé að missa fylgi kvenna yfir til Vinstri - grænna.

Einar Mar vitnar í eldri rannsóknir sínar og segir muninn á kosningahegðun karla og kvenna mestan á Íslandi af öllum Norðurlöndum enn til er stuðull sem mælir í hvaða hlutföllum konur og karlar kjósa flokka. Hann sýnir svo ekki verður um villst að munurinn á afstöðu kynjanna er mestur hér á landi.

Einar Mar segist telja að munurinn leiði í ljós að jafnrétti hér sé ekki komið jafn langt á veg og á hinum Norðurlöndum og konur kjósi í meira mæli flokka þar sem konur séu í forsvari. Þá virðist konurnar fæla karlana frá því að kjósa þá flokka.