Fær ekki að snerta bílinn eftir ölvunarakstur

Tuttugu og fjórir ökumenn voru teknir fyrir ölvunarakstur á höfuðborgarsvæðinu um helgina, langflestir í Reykjavík. Samkvæmt tilkynningu lögreglunnar í Reykjavík var um að ræða tuttugu karlmenn og fjórar konur. Í hópnum reyndist sautján ára piltur sem fengið hafði bílpróf fyrir fáeinum mánuðum en hann var tekinn í Árbænum aðfaranótt laugardags. Hann var færður á lögreglustöð og þar hringt í mömmu hans. Segir lögreglan hana hafa verið mjög þakkláta og hún lýst því yfir að eftir þetta fengi sonurinn ekki að snerta bílinn.