OR semur um jarðhitarannsóknir í Djíbútí

Orkuveita Reykjavíkur mun starfa að þróun jarðhitasvæða til raforkuframleiðöslu í Djúbúti ásamt yfirvöldum þar samkvæmt samkomulagi sem undirritað var í dag.

Það voru Vilhjálmur Þ. Vilhjálmsson, borgarstjóri Reykjavíkur, og Mahmoud Ali Youssouf, utanríkisráðherra Djíbútís, auk Guðlaugs Þórs Þórðarsonar, stjórnarformanns Orkuveitu Reykjavíkur, sem skrifuðu undir samninginn að viðstöddum forsetum Íslands og Djíbútís.

Fram kemur í tilkynningu frá Orkuveitunni að við sama tækifæri hafi Vilhjálmur Þ. Vilhjálmsson og Ali Ismail Yabeh, borgarstjóri Djíbútís, höfuðborgar landsins, handsalað samkomulag um samstarf borganna.

Samningur Orkuveitunnar og ríkisstjórnar Djíbútís felur í sér einkarétt Orkuveitunnar til rannsókna á jarðhita á tilteknum landsvæðum. Hann gildir til eins árs til að byrja með en verði niðurstöður rannsókna jákvæðar er gert ráð fyrir að Orkuveitunni verði veittur nýtingarréttur í samræmi við lög landsins.

Þá er þess getið að Djíbútí byggi nú 85 prósent orkunotkunar sinnar á innfluttu jarðefnaeldsneyti. Vonast stjórnvöld þar í landi til að virkjun jarðvarma verði til þess að bæta lífskjör í landinu.