Forseti Djíbútís kemur til landsins

Forseti Djíbútís, Ismail Omar Guelleh, er væntanlegur hingað til lands nú eftir hádegið í svokallaða vinnuferð sem stendur fram á eftirmiðdag á morgun. Með honum í för eru utanríkisráðherra Djíbútís og sendinefnd skipuð embættismönnum og sérfræðingum á sviði jarðhitanýtingar.

Til stóð að forsetinn kynnti sér hina nýju Hellisheiðarvirkjun nú klukkan tvö en vegna seinkunar á vél hans verður ekki af því. Hins vegar er hann væntalegur í höfuðstöðvar Orkuveitu Reykjavíkur laust eftir klukkann þrjú þar sem forseti Íslands og borgarstjórinn í Reykjavík taka á móti honum.

Síðar í dag mun svo Valgerður Sverrisdóttir utanríkisráðherra funda með starfsbróður sínum frá Djíbútí og þá munu forsetar landanna funda á Bessastöðum í kvöld.

Á morgun heimsækir hópurinn svo höfuðstöðvar Glitnis og á viðræður við forsvarsmenn bankans og forystumenn sjóðsins Geysir Green Energy. Síðasti áfangastaður gestanna er Bláa lónið.